FICmail

Proxecto obxectivo da práctica de validación automática: sistema de correo electrónico

Descrición do sistema

Estamos ante un simplificado sistema de correo electrónico que se quere poñer en produción. Como responsable de tomar a decisión sobre se a implementación está lista, debes validar a lóxica proporcionada.

Non dispós de documentación técnica algunha, alén da descrición dos requisitos funcionais de alto nivel que se reflectiron de xeito pouco formal ao principio do proxecto. Esa especificación indica o seguinte:

• O sistema debe permitir manexar o correo electrónico dunha persoa, así como un conxunto de servizos de arquivado de correo, de xeito que sexa posible explorar, ler e arquivar correos electrónicos, realizar procuras neles e xestionar os arquivadores de correo.
• Un correo electrónico (Mensaje) debe ser un arquivo de texto plano (Texto) cunha marca de lectura, marca que debe ser editable (debe poderse marcar un correo electrónico como lido ou non lido segundo se queira). Os correos electrónicos poderán organizarse en carpetas, que á súa vez poderán estar contidas noutras carpetas.
• As mensaxes poden levar cabeceiras asociadas, isto é, pares nome/valor (como por exemplo "Asunto"/"Ola" ou "Destinatario"/"persoa@udc.es"). Loxicamente, a presencia de cabeceiras afecta tanto ao tamaño como ao aspecto da mensaxe á que acompañan.
• As mensaxes poden tamén levar un ou varios arquivos adxuntos, afectando a súa presencia tanto ao tamaño como ao aspecto da mensaxe á que acompañan. De feito, debe poder ser posible empregar mensaxes completas como anexos (reenvíos).
• A operación de procura consultará o contido dos correos electrónicos. As procuras realizadas sobre carpetas funcionarán recursivamente, e o resultado consistirá nas mensaxes para as que o seu contido (arquivo asociado) responde ao criterio de procura.
• Debe implementarse a posibilidade de limitar a cantidade de resultados devoltos se o volume de resultados obtidos fose moi elevado.
• A operación de exploración só funciona sobre carpetas, mais nese caso non funcionará recursivamente.
• Un servizo de arquivado de correo (Archivador) debe permitir almacenar correos electrónicos sempre que o seu espazo dispoñible o faga posible. Co fin de proporcionar un servizo de arquivado de correo escalable, os arquivadores poden organizarse xerarquicamente de forma que un arquivador sobrecargado (isto é, sen espazo dispoñible) podería delegar a responsabilidade do arquivado dun correo noutro arquivador. Os servizos de arquivado tratarán carpetas e mensaxes sen distinción.
• Debe implementarse a posibilidade de que os servizos de arquivado inclúan un servizo de log que rexistre por saída estándar información sobre as peticións recibidas

O sistema inclúe unha interface de usuario, mais o obxectivo principal non é validar esta, xa que a interface real que se usará será unha interface web proporcionada por un terceiro fabricante. Porén, podes empregala para familiarizarte co funcionamento da implementación que debes validar.